Талдау нәтижелері Нұр-Сұлтан қаласындағы «UMC» корпоративтік қорының Республикалық диагностикалық орталығында коронавирустық инфекцияны зерттейтін жаңа ПТР зертхана ашылды.
Мұндай зертхананың ашылуы COVID 19 індетімен күресте маңызды қадам саналады. Өйткені, ПТР-тестілеу арқылы адам ағзасында вирустың бар-жоғы анықталады. Және ол диагнозды зертханалық растау үшін қажет. Биоматериал ретінде жұтқыншақ пен мұрын қуысының қосылған жерінен алынатын жұғынды пайдаланылады.
Сараптама құны 14 мың теңге, материалды алу 1 мың теңге.
ПТР тестілеу үшін «UMC» корпоративтік қорының umc.org.kz сайтында сауалнама толтыру керек.
Сосын Байланыс орталығының мамандары хабарласып, пациентті зерттеуге жазады.
Республикалық диагностикалық орталығы ғимаратында барлық санитарлық-эпидемиологиялық нормалар сақталған. Өзге науқастардың қауіпсіздігін қамтамасыз ету үшін зертханаға бөлек есіктен кіреді. Сондай-ақ, медицина қызметкерлері үшін барлық тиісті қорғаныс шаралары қарастырылған.
«UMC» корпоративтік қорының Республикалық диагностикалық орталығының зертханасы Қазақстандағы ең ірі зертханалардың бірі екенін айту керек. Онда зертханалық диагностиканың түрлі бағыттары бойынша 600-ден астам зерттеулер жасалады.
Зертхана ISO 15189:2012 «Медициналық зертханалар. Құзыретке арнаулы талаптар» халықаралық стандартарына сәйкес келетіні туралы аккредитациядан өткен.